Mutumwa izita rekuti mweya wakatumwa naMwari. Saka vanhu vaibvunza kuti, “Ko, ava vanonzi ani? Toti chii?” Zvikanzi, “Toti VaMutumwa.” Ndobva zvangonzi VaMutumwa, nokuti vanotumwa. Ehe, ivo vanenge vasingazvizive zvinozongouyawo, kunzi, “Ndanzi ndiite zvakati.” Ehe, mweya ndounenge wava kuzotaura, kutaurira vanhu.
Kana vakatumwa vanogona kutumwa kuuya panapa. Vouya. Vanofamba netsoka. Vouya panapa. Vongosvika chete, vongogara. Tokurukura navo, tokurukura navo, onzi, “Ha, ndava kuenda.” “Ko, makuenda?” Onzi, “Ha, ndandangotumwa kuti ndisvike pano chete chete.” Ndizvozvo chete zvavanenge vangotumwa izvozvo kuti vaite.
Vakambotumwa futi paita musangano wemaPositori. Ndobva vatumwa kunzi, “Pari kuuya dutu.” Mhepo iyaiya yakakurisisa maningi, inogona kutakura zvinhu zvavo zvese. Saka ndobva vasvika, zvikanzi, “Ndatumwa kuti ndizoita muteuro panapa. Pari kuuya dutu.”
Zvikanzi, “Aiwa, isusu hatiite zvemaDzimbahwe, tinoita zvemaJesu.” Zvikanzi, “Ha, zvakanaka. Ininiwo zvangu ndinonamata Ambuya Nehanda, asi ndandatumwa zvangu kuti ndiite muteuro kuti zvinhu zvenyu zvikurerukire.”
Vakangobva mhepo inobva yatanga. Vakamhanya vachitevera. Zvikanzi, “Aiwa, taurirai Jesu avhare mhepo yacho.” Ndobva vaenda! Mhepo yakatakura misasa yese yavakanga vakaita ipapo. Yakatakurwa yese, yakaparara yese misasa iyaiya. Zvikanzi, “Ndozvandatumwa ini, zvokuti ndandatumwa kuti ndikuitire muteuro, zvino imi matii? Munonamata Jesu.”
Saka ivavo futi zvavanoita manje zvaiitwa naJesu. Tichizvinzwa mumaBhaibheri zviya zviya, ndozvavanoita izvozvo. Vanogona kuti vanenge vagere sezvakaita uko. Mogoridza panapa zvogonakidza maningi. Kubva kwavanoita uko hamumbovaona. Vanouya so, moona vava kutamba manje. Kubva kwavanoita apa hamuvaone, munozoona vagara kuya kuya sevanga vakaita izvozvo. “Ha imimi, sei? Vakura ava.”
Kuchechi, vakaimba chaizvo, kuimba zviya zviya zvekuti zvanakidza zviya zviya vanosimuka so, kutenderera so pamusoro apa. Pamusoro penyu muchiimba imimi, ivo vachitenderera pamusoro apa. Vodzoka, vanomara pasi so, vogara pavanga vagara so, munovatarisa.
Rimwe zuva kwakaitwawo musangano. Pari panonzi paDambatsoko, kuChiweshe uko, tapfuura paNzvimbo. Saka pakaitwa musangano wakanga uchiri kutanga, uri musangano weZANU-PF. Ndobva vauya, zvikanzi, “Ndatumwa kuti President paachasvika, pane munhu ane pfuti umo.”
Ndobva vadii? Zvikanzi, “Mapurisa endai motora munhu imomo, mubvunze.” Vatorwa, ndokuoneka anei? Ane revolver muhomwe make. Vachingomutora achibva so ndopakamara helicopter yaPresident, vachisvika vachipinda mumusangano. Zvinotyisa.
Tikazoenda kuChimbikiza, kuChiburi, tikaita svondo rese tiri ikoko. Vakauya vakabata pfumo ravo so, ndobva vasvikoribayirira paruware so, ndobva vagara, ndobva vazembera papfumo ravo so, rakabayirira paruware.
Vane chimwe chinhu chekupfura, handisati ndazvinzwizisa izvozvo. Vane hoko dzeemuzhanje dzavakaveza so, vanosvikodzirovera padombo zvichikwana kupinda pasi padombo.
Panapa so, vanorovera uko. Kana vatumwa kuti varovera hoko dzacho idzodzo, vanosvikorovera ipapapa. Havatsvage kana chokucheresa kana chokudii? Vanongotora hoko dzavo vorovera so, vachirovera hoko iyaiya, voisiya yakadaro so. Munogara kusvikira hameno, yakadaro iripo. Saka vamwe vaivati Svingarehoko, nokuti vanogara vakatakura svinga rehoko dzacho idzodo. Vanenge vakatakura hoko idzodzo, pavanenge vatumwa anzi “Enda unorovera hoko,” vanosvikorovera ipapo.
Nyika ichiri kunzi Rhodesia, pana Third Street paive nestatue yaRhodes. Vakairovera hoko vachitenderedza so, vachirovera hoko. Masoja variko ukoko vakagara, nokuti vaiti ivo pamwe vanhu vanogona kuparadza statue iyoyo. Saka havana kudii? Havana kumbobva ipapo, vaigara vakangoichengetedza. Asi masoja haana kuvaona.
Vakasvika kuseri kwemasoja vakaitenderedza so. Ivo vakasvika ndobva vaita muteuro wavo kuseri kwemamwe masoja, ndobva vanamata ipapo. Vapedza kunamata ndobva vapinda, ndobva varovera hoko ipapo, vachitendereredza vachirovera hoko, ndobva vabuda, ndobva vaenda. Masoja haana kumboona kuti pane vanhu vapinda. Vakafamba Zimbabwe yese vachirovera hoko mumacorner ese eZimbabwe yese nguva yehondo ichitsva, ivo vachifamba.
Saka vakanzi nemasoja, zvikanzi, “Pane munhu watiri kuona anofamba akatakura tsvimbo yake, akapfeka magarments.” Zvikanzi naSmith, “Akaita sei munhu iye?” Zvikanzi, “Ha, hatimbomunzwizisa kuti akaita sei.” Zvikanzi, “Mutore pikicha.” Ndobva vatorwa pikicha. Saka papikicha paya pakabuda ngirozi iri ipapa, ivo vari ipapo. Ndobva paibuda paine zvinhu zviviri, asi vakapikicha munhu mumwe chete. Ndobva pabuda ngirozi, ivo vari panapa.
Ndobva varatidza Smith, zvikanzi, “Ndiye munhu watiri kuona iyeye.” Zvikanzi, “Ha, ndiMaidhona! Musiye akadaro kana mukamuona, murege.” Ndobva vainzi Maidhona.
Saka ndakacomposa rumbo runonzi Tinovatenda. Saka vakandinzwa ndichiridza ndobva vauya, ndobva vagara ndichiridza. Ndobva ndamboregera. Zvikanzi, “Aiwa, ridzai enyu.” Ndobva ndaridza. Zvikanzi, “Rumbo urwu munoruti aniko?” Ndikati, “Ha, ndinongoridzawo zvangu inini, zvinenge zvinchingouya mumusoro.” Zvikanzi, “Ha, rumbo irworwo totoda kuti muzotiridzira kuDomboshawa.”
Tinovatenda, yakaridza naTute Chigamba padambarefu rinonzi Yangu Ndega
Takaita mazuva matatu tiriko kuDomboshawa. Kwaitwa rushanga. Munouraya mbudzi inodyiwa ikoko, haienda kumba. Haibikwa kumba, inodyiwa ikoko ichichekwa, ichigochwa ikoko ichidyiwa.
Saka ndobva vanzi, “Mozondiridzira irworwo.” Ndobva ndazovaridzira. Vaifamba netuvana tuduku, tusikana so twakapfeka magarments. Vachifamba, vachiuya zvishoma-shoma, ndichiridza kuno uku. Zumba, Asan uyauya ndiye airidza hosho.
Ndobva vauya, ndobva vapinda so, ndobva vasvika paive nemihacha mitatu yekenge iripo. Ndobva vasvika, ndobva vatenderera, ndobva vatarisa mudenga mumuti. Ndokuona makasungirirwa dombo. Ranga rakasungirirwa rakatarisa pasi so. Mudzimu ndobva wauya, ndobva wakanzi, “Asungirira izvozvo ndiani?” Hapana azivikanwa kuti asungirira ndiani. Ndobva anzi, “Bvisai,” ndobva zvabviswa.
Ndobva vanditi ivo, “Chimbo ichocho chimbo chemuteuro. Chero pamunenge mafunga kuti muteuro izvi zvamunenge muchida, munoridza ichocho.” Ndikati, “Ha! Ndawina!” Dzimbo dzangu dzese dzaingogara dzakawina.