Kugadzira Mbira

Ndakambogadzira mbira na’79. Ndobva ndagadzira mbira, ndobva dzatorwa mbira dzangu dzekutanga. Ndobva ndagadzira, ndobva dzatorwa nemumwe munhu. Saka akandipa five dollars achibva atakura mbira, ndobva aenda. Ndobva ndazogadzira dzimwe futi, ndobva kwauya mumwe futi. Dzisati dzapera zvikanzi, “Ndichazoona kana dzapera.” Ndobva adzoka, ndobva aona dzapera, ndobva andipa five dollars, ndobva atakura mbira, ndobva aenda. Ndikati, “Ha, zvinhu zvakumboita sei?”

Ndobva ndadii? Ndobva ndagadzira gwariva regandanga. Saka gwariva regandanga iri, ndakanga ndaona gandanga rairidzwa nani? NaVaGora, dzemavembe dziya. VaGora ndobva vati “Ha, kana uchidzida.” Ndikati, “Ndogadzira. Kana ndagadzira, mozondiisira tune.” Ndobva ndagadzira, ndobva vandiisira tune. Saka gwariva iroro handina kudzigadzira ndichiti ndiri kuda kugadzira mbira dzakanaka. Handina kudzifila mumaside. Ndaingofila uko, kwokuridza chete.

Saka kwakauya mumwe, zvikanzi, “Ha, mbira dzakanaka idzi.” Ndikati, “Aiwa, ndedzangu.” Zvikanzi, “Ha, nditengesere.” Ndikati, “Handikwanise kukutengesera. Kana uchida kuti ndikutengesere wondipa 75 dollars.” Ndobva ati, “Ha, ndinokupai!” Ehe, anga atobvuma, nokuti aiti dzakanaka.

Ndikati, “Aiwa, iwe hausi kuona kuti kuramba here? Mbira ndotengesa 5 dollars. Idzi ndokutengesaka idzi 75! Hazvingaite.” Zvikanzi, “Ho? Horaiti.” Ndikati, “Ndichakugadzirira dzako.” Saka ndobva ndazomugadzirirawo dzake, ndobva ndamborega kudzigadzira.

Saka zvakazoitika manje ndezvokuti, kubva ’81 kusvika ’83 ndanga ndichirwadziwa nemudumbu. Ndakaenda kunoridzira n’anga, ndobva ndazobva ikoko nokuti vanga varamba kundirapa mudumbu. Ndobva varamba. Ndikavati, “Ndipei mushonga” vanobva vadii? Vomboenda zvavo, vombokanganwa. Ndodzoka, vonzi, “Ha, mushonga wacho handina kuzokwanisa kuenda kunotora.” Ndobva ndabva ikoko, ndobva ndadzokera kumba kuHighfields. Saka ndadzokera kumba ndikati, “Ha, handichadzokera uko.”

Ndobva ndazodaidzwa kune rimwe bira kuGlen Norah B navamwe sekuru. Ndovakazonditi, “Haufanire kudya mushonga, unofanira kunwa fodya yaunoputa.” Saka ndobva ndaita seizvozvo. Ndakamboti regere ndikati “Ha, pamwe kunyepa.” Saka madzimai ndovakati, “Ha, imi makanzi monwa fodya. Ko chiri kukutadzisai kunwa fodya chii?” Ndobva ndanwa fodya iyaiya, mudumbu ndobva manyarara. Saka kubva nguva iyoyo mudumba mukandirwadza ndonwa fodya. Musoro ukandirwadza ndinonwa fodya.

Ndabva kun’anga kuya kuya ndikati “Ko, zvino ndoitei?” Ndakazoona kuti, “Ha, zvingatoita ndozvokuti ndomboita basa remaoko.” Ndokugadzira mbira, hadzina anotenga, ndoisa mumba. Kugadzira mbira, hadzina anotenga, ndoisa mumba. Kwouyawo mumwe munhu otenga one. Anotenga nechikwerete. Five dollars, kuita chikwerete chefive dollars. Saka zvaindinetsa kuti “Ko, chii chiri kumboitika? Ndatova munhu achasvika panhamo yakaoma. Apa vana hapana ari kusevenza. Inini handisi kusevenza. Tese takangogara, vakatarisa kwandiri.”

Saka takashinga kusvika ndobva pazodii? Ndobva ndaenda kuGuruve kumatateguru uko. Ndasvika kuye ndobva zvanzi, “Basa rauri kuita iri uri kuti ibasa rakaipa.” Ndikati, “Ha, iri rakaipa, harindibhadare.” Zvikanzi, “Uchariona kukosha kwaro.” Ndikati, “Ndichariona kukosha kwaro? Ini ndisina chandiri kumboita, hapana mari yandinowana, five dollars! Vana vangu vanopedza svondo here vachidya five dollars?” Zvikanzi, “Richakukoshera pamberi.”

Vakataura izvozvo ndobva ndauya kuno uku, ndobva ndaenda kuOld Highfields, kwaambuya kuye. Ndobva ndasvikoona mumwe mudzimu wainzi Seke. Zvikanzi, “Ha, iwewe pauri handikwanise kutsanangura.” Ndikati, “Sei?” Zvikanzi, “Handina zvandiri kuona. Ndiri kuti ndikamboti onei zvodzima. Ndikati onei zvinodzima.” Ndobva vati, “Ha, zviri pauri iwewe, mweya uri pauri wakasimba chaizvo, unotoda mumwe mweya wakafanana naiwoyo.”

Saka ndobva kwauya shave remumvura, njuzu inobva yasvika paari. Ndobva yazotsanangura manje, zvikanzi, “Motoita mabiko eparty.” Zvino ndikati, “Mari yacho tinoiwana kupi? Isu hatina mari.” Zvikanzi, “Munongoita zvamunenge mangoita izvozvi zvidikidiki.” Ndobva ndagadzira mbira, ndobva dzatengwa, ndobva taita izvozvo. Vana avo ndobva vandibatsira. Irene anga akusevenzawo, ndiye akanga akuchitibatsirawo manje, achisevenza kuDance Company.

Saka tadaro so, tapedza two weeks Erica ndobva auya. Ndobva auya nemachine wokusonesa. Zvikanzi, “Ndakuigirai machine yekusonesa.” Tati, “Machine wekusonesa?” Zvikanzi, “Ehe.” Nokuti akanga ambotakura dzimwe mbira, ndobva anotengesa, ndobva auya nemari yacho, ndobva auya nemachine. Ndikati, “Ha, machine chaiyo chaiyo!” Ndikati, “Saka zvinhu zvava kukosha manje.”

Ndobva ati, “Ndiri kuda mbira thirty.” Ndikatanga kudzigadzira mbira thirty ndobva ndadzipedza, ndobva adzitakura. Ndobva tichitanga kuona manje kuti, “Ho, zvinhu zviye zvakuchinjinuka manje,” achitengesa. Aimbotengesa thirty US dollar, mbira one. Ndobva auya nemari iya ndikati, “Mari iyi ndakudii? Ndakuisa kubhangi.” Ndobva ndavhura bank account. Saka iye anga akuti akatengesa mbira uko, owaira kuaccount kwangu.

Saka ndokutanga zvinhu zvese zvachinjinuka. Saka iye zvino izvi, vanhu vaye vaitiseka vaya vari kuti, “Mune chipo chakanaka.” Ndozvavanga vakuita manje. Zvanzi, “Mune chipo chakanaka. Mwana wenyu akuenda kuAustralia, kuAmerica, kupi nekupi. Achienda kuGermany, East Germany, kuKorea, China, ari kuenda. Saka mune chipo chakanaka.” Ndikati, “Ko inga, maitiseka muchiti tiri marombe?” Zvikanzi, “Chokwadika mune chipo chakanaka.” Zvikanzi nevamwe, “Ehe, kuseka kwaye, tai tisingazive kuti zvinosvika ipapo. Saka iye zvino izvi zvadii? Zvakukusvitsai pakakura manje.” Ndikati, “Ha, zvakanaka.”

Ndobva taenda kumusha, takunogara kumusha. Erica aita akauya kuno uko anosvika kumusha, opedza two weeks ari kumusha. Asi basa rangu harina kumbodzima,  ndakangoramba ndichishanda, ndichishanda.

Saka ndobva ndaenda ndichitonotenda kwatateguru, kwaDumbu. Kuna baba kwozoita mukoma aipoterwa nemhondoro iyoyo. Kwozoita sahwira wekwaNyandoro. Saka ndavanonyora mari iyoyo mubhuku. Inochengetwa, kana mhondoro iya yazopotera futi inouya ichiratidzwa mari yacho iyoyo. Ndakaenda netwenty five thousand yandikasvikosiya.

Ndikati “Basa riya riya, makati richakosha pamberi. Saka rakosha iye zvino. Ndakufambawo ndichienda kunzi kwenyika ndichidzoka. Vana vangu vari kundipawo, saka rakosha basa riya. Ini ndiri kushandawo futi ndichidii? Ndichiwanawo yangu mari yandanga ndisingaite muupenyu.”

Saka basa riye rakukosha, ndokukosha kwakuita basa racho. Iye zvino zvinoitika kuti tinomboishaya, asi hatiishayisise.