Amai Vaive NeTotomwe

Takabva kupurazi muna 1946. Saka patakabva ikoko, ndaigara naambuya vangu vainzi Manungwa Chinzodzi, ndivo amai vababa vangu. Kana tikapedza kudya sadza manheru tisina zvokuita, taigara pasi. Vamwe vana havakurumidze kurara. Saka ivo pavaiita ngano dzavo, vanenge vachiitira kuti vaye vanhu vanononoka kurara vaya vakurumidze kurara. Nokuti dzimwe ngano dzinogona kukufina. Unoteerera, unoteerera, unobva wakotsira. Vobva vakubvunza kuti, “Ko, asi uri kuda kurara here? Chienda unorara.” Unobva wasimuka, uchienda kunorara. Panozosara vazukuru vaviri, kana vatatu. Saka vobva vasara nevatatu ivavo. Kana vakuenda kunorara, havanetseke vatatu ivavo. Vanongoti “Takuenda kunorara.” Vorara. Saka ndozvataita kare izvozvo.

Zvimwe ndakazvinzwa ndisati ndaenda kuchikoro, zvimwe ndikazvinzwa ndichibva kuchikoro, nokuti ndikabva kuchikoro, ndinosvika pamusha, nguva huru yangu ndeyekuna Ambuya. Vandidawo chaizvo, ini ndaivadawo nokuti ndaambuya vangu.

Amai Vaive Netotomwe

Pane mumwe amai, vaive netotomwe, kana kuti sutumwe. Kadzinyu kayaka, kakaita brown brown necream crream so. Kanofamba, kanomhanya chaizvo. Saka ikako kanonzi totomwe. Saka, amai ava vaive nekalizard ikaka, ndokaivashandira kumunda. Saka ivo vaiti kana vaisvika kumunda zviya, vaida kunhonga nyemba. Vakunhonga nyemba, vosvika, voimba:

Tononga nyemba
Tukutsu tuwaya hondende
Tononga nyemba
Tukutsu tuwaya hondende
Tukutsu tuwaya
Tukutsu tuwaya hondende

Saka, vanobva vazadzisa tswanda yavo, vachidzokera kumba. Mangwanani acho, kana vadzoka futi, ndobva vanoona vamwe vari kuti, “Ko, ivava vari kunhonga sei nyemba? Isu tiri kutambudzika nenyemba dzakawanda maningi. Ivavo hazvivanetse. Vanoswera vachinoimba kumunda kwavo regai tinoone.” Ndopavakazoona pane ikoko katotomwe kachidii? Kachinhonga nyemba. Kachiisa mutswanda. Kachinyonga nyemba, kachiisa mutswanda. Saka, kuti tukusutu waya, kudai so. Kubheura. Kudai so. Tukusutu waya. Saka, kachingounganidza chete. Kachingounganidza. Mazuva maviri, matatu, vapedza. Vamwe vachiri mumunda, vari kunhonga ivo. Saka vakazozvitsvaga, ndobva vazviwana, zvikanzi “Oh, oh, ndozvinoitwa izvi. Amai ava vanotove nekanhu kavo kanovashandira.” Ndokupera kwakaita rungano rwacho ruya, ndosarungano.

Kureva kuti vanhu vanoita zvinhu zvinenge zvikwambo. Saka vanhu ava, vaita zvinhu zvinenge zvikwambo zviya. Ndozvinovashandira kumunda.  Saka, vanhu vaitiwo, “Munoona mumwe munhu achirima, zvakanyanyisisa, musafunge kuti munhu kurima kwaari kuita zvakanyanyisisa. Ane simba chaizvo. Asi ane zvimwe zvinhu zvamusingaone zvinomushandira.”

Zvokuti vamwe vane mushonga wakadaro unonzi divsi. Mushonga uwoyo, munhu anongorima padukuduku chete, one acre. One acre iyoyi inomupa two, four, five tons dzechibage. Imimi munorima five acres, munotadza kuwana one ton. Saka iye anopinda munda menyu, anotora mbeu dzenyu dzese dziende kwaari. Saka ndozvavanoita. Saka idivisi.