Kwakabva Mbira

Sekunzwa kwandikaita ndichibvunza midzimu, vakatiwo mbira vainzwa mumhanzi wairidzwa pakati pegungwa, padombo. Saka nokupfuura kwavaita ipapo vaingonzwa mumhanzi uchingorira. Saka ndobva vasarudza kuti “Ah! Tingagadzire chii chiridzwa chatingagadzire, chingatowirirane nemumhanzi watiri kunzwa?” Ndobva vagadzira chiridzwa chembira.

Chiridzwa ichi chembira chakatanga kari karimba kane minzwa inokwana mitanhatu. Saka vakaridza, vakaridza, ndobva vawedzera mumwe wechinomwe. Saka nokuenda kwenguva, zvinoenda nekuimba kwamunoita. Munenge makutsvaga mimwe minzwa inowirirana neizwi, kuti ukakwidza izwi, apa panoda kuenda minzwa. Ukadzikisa zvakanyanya, wototsvaga mumwe munzwa wakadii? Wakadzikawo.

Saka ndokuramba vachiridza. Saka kuridza kwavaiita ikoko, ndopavakazoti vakuwedzera-wedzera, kusvikira karimba kaita minzwa gumi nemishanu. Vamwe ndobva vawedzera kuita gumi nemipfumbamwe.

Saka ndokavaiti karimba kakuru. Saka mukarimba ikako ndomakazobva njari. Njari ine minzwa inokwana makumi matatu nemitanhatu. Saka ava vamwe vakasara kuMozambique, ndobva vaita matepe. Matepe, vanoti nyunga-nyunga. Nyunga-nyunga ine uvembe wakaita fanike gandanga. Saka ine uvembewo. Ndobva vadii? Vaitawo minzwa inokwana makumi matatu nemiviri. Saka matepe ine makumi matatu nemiviri, njari makumi matatu nemitanhatu.

Saka muno umu, ndobva maitawo vamwe, ndobva vawedzera, ndobva vaita munyonga, vakuteerera nyunga-nyunga. Ndobva vati muno umu, ndobva vati munyonga. Munyonga unogona kuita minzwa makumi mashanu. Makumi mashanu. Unoziva David Gweshe? Anoridza munyonga.

Saka munyonga inoridzwa naGweshe, yaimboine makumi matanhatu, ndobva abvisa, ndokubvisa mimwe minzwa, ndokusara makumi mashanu. Saka kana uchiridza, minzwa yacho iri padhuze nepadhuze so. Kakadai so, padhuze nepadhuze. Saka unoti kana wakuridza, unoridza uchibva pamusoro, uchirova pamusoro nepasi, pamusoro nepasi. Saka ndomaridziro aanoita.

Saka ndobva pazobva ipapo, vamwe ndokuronga kugadzira chakwi. Chakwi ndodzatinoridza dziya dziya, dzeNyamaropa. Ichakwi. Saka vagadzira chakwi, ndobva vaita minzwa inokwana makumi maviri memiviri. Ndobva, nokuimba kwavanoita, zvikanzi “Ah, regai ndimbowedzera.” Ndobva vawedzera imwe, ndobva yaita chii? Yaita makumi maviri nemina. Saka vazoenda futi, ndobva vadii? Varamba vachingowedzera. Kusvikira zvokuti inogona kusvika makumi maviri neminzwa misere.